حیدر بابایه سلام

نظرات 1


کتابت قرآن بخط استاد شهریار





تصویر اولین نسخه از کتاب شعر «حیدر بابا» که در سال 1332 چاپ شده

حیدربابا منظومه سی

حیدر سؤزو عرب دیلینده " آسلان / آرسلان " آنلامینا گلیر.

بو سؤز، حضرت علی علیه السلامی دا "لقب"ی  دیر.

آسلان ، تورک لر آراسیندا  ایگیدلیک  علامتی  دیر.

حیدر سؤزو شخص آدی اولاراق دا ایشله نیر.

بابا سؤزو " پیر ، مرشد کامل ، پیر طریقت " کیمی ده ایشله نیر.

حیدربابا ، اوستاد شهریارین دوغولدو کند و بو کنده اؤزآدینی  وئره ن داغین آدی دیر.

حیدربابا ؛ الی آچیق ، برکتلی ، گؤنوللری  شاد ائیله ین ، کندلی لرین دایاغی ، ائلیمیزین سایقیلی آغ ساققالی  کیمی  گؤستریلیر.

 

حیدربابا منظومه سی، هجایی  وزن ینده  دیر. آنجاق اوستاد شهریار بورادا  یئنی بیر هجایی شعر شکل ینی  ابداع و یاراتمیشدیر ، اوستاددان سونرا دا تورک  شاعیرلری اونو تقلید ائتمه یه ، اونا " نظیره " یازماغا باشلامیشلار.

حیدر بابا منظومه سینده ایشله نن "سس- فونئم لر" ده  آخیجی و آهنگلی دیر. سانکی ، اوستا  بیر  اوزان-عاشیق ، اونو طبیعت قوینوندا اوخویور ؛ داغلار ، بولاقلار ، قوشلار ، چیچک لر ده  اؤز اوره یه یاتان سس لری ایله اونا جواب قایتاریر.

آنجاق شاعیر بابامیزین  اوره گی ؛ گاه سئوینج ایله جوشور گاهدان  دا نیسگیل دن- آیریلیقدان  داریخیر. نئیله مک اولار کی، " سلیماندان ، نوحدان قالان دونیادی".

حیدربابا منظومه سی  دونیانین ان دیری و جانلی منظومه سی دیر. بو منظومه ده ، بوتون  منظره – گؤرونتولر،  چوخ خوشا گلیم و دوغال( طبیعی)  ترسیم اولونموشدور:

1) یاغیشلی بیر گوندور . حیدربابا داغی نین باشیندا ایلدیرملار شاخیر ، چاققیر – چاققیر سئللر آخیر ، جاوان قیزلار دا  بو منظریه  باخیر.

2) باخچالاردا چیچکلر آچیب  ؛ دووشانلار  کوللارین  دیب ینده اویناییر ، کهلیک لر ده  گؤیده  اوُچور.

3) بایرام چاغی دیر ، قار چیچگی  چیخیب ، آغ بولوتلاردان  دا  باهار یاغیشی دامجی - دامجی  سوزولور.

................

هر کیم حیدربابا منظومه سینی ، عؤمرونده  بیر یول اوخوسا ، اونو یاددان چیخارا بیلمز. چونکی ، حیدربابا ، بیزیم کئچمیشیمز دیر. اولو بابالاریمیزدان  بیزه  قالان  توکنمز بیر خزینه - یادگار دیر. تورک  دیلی نین " شاه اثری" دیر.

حیدربابا منظومه سی ، دونیانین چوخ دیللرینه  ترجمه ائدیلمیشدیر. بو گون دونیادا  حیدربابا منظومه سی اوزوندن " آذربایجان دیلی نین گرامری " تدریس اولور.













استاد شهریار در حال شعر خواندن



حيدربابا ، يوْلوم  سننَن  کج اوْلدى
عؤمروم کئچدى،گلممه ديم،گئج اوْلدى
هئچ  بيلمه ديم  گؤزللرون نئج اوْلدى
بيلمزيديم دؤنگه لر وار ،‌ دؤنوم وار
ايتگين ليک وار ، آيريليق وار ، اؤلوم وار




مقبرة الشعرای تبریز (آرامگاه ابدی استاد شهریار)


دانلود منظومه ی حیدربابایه سلام به انگلیسی pdf


 

تورکون دیلی ( استاد شهریار)

تورکون دیلی تک سئوگیلی ایسته کلی دیل اولماز

اؤزگه دیله قاتسان بو اصیل دیل اصیل اولماز


اؤز شعرینی فارسا – عربه قاتماسا شاعیر

شعری اوخویانلار ، ائشیدنلر کسیل اولماز


فارس شاعری چوخ سؤزلرینی بیزدن آپارمیش

« صابیر » کیمی بیر سفره لی شاعیر پخیل اولماز


تورکون مثلی ، فولکلوری دونیادا تک دیر

خان یورقانی ، کند ایچره مثل دیر ، میتیل اولماز


آذر قوشونو ، قیصر رومی اسیر ائتمیش

کسری سؤزودور بیر بئله تاریخ ناغیل اولماز


پیشمیش کیمی شعرین ده گرک داد دوزو اولسون

کند اهلی بیلرلر کی دوشابسیز خشیل اولماز


سؤزلرده جواهیر کیمی دیر ، اصلی بدلدن

تشخیص وئره ن اولسا بو قدیر زیر – زیبیل اولماز


شاعیر اولابیلمزسن ، آنان دوغماسا شاعیر

مس سن ، آبالام ، هر ساری کؤینک قیزیل اولماز


چوخ قیسسا بوی اولسان اولیسان جن کیمی شئیطان

چوق دا اوزون اولما ، کی اوزوندا عاغیل اولماز


مندن ده نه ظالیم چیخار ، اوغلوم ، نه قیصاص چی

بیر دفعه بونی قان کی ایپکدن قزیل اولماز


آزاد قوی اوغول عشقی طبیعتده بولونسون

داغ – داشدا دوغولموش ده لی جیران حمیل اولماز


انسان اودی دوتسون بو ذلیل خلقین الیندن

الله هی سئوه رسن ، بئله انسان ذلیل اولماز


چوق دا کی سرابین سویی وار یاغ – بالی واردیر

باش عرشه ده چاتدیرسا ، سراب اردبیل اولماز


ملت غمی اولسا ، بو جوجوقلار چؤپه دؤنمه ز

اربابلاریمیزدان دا قارینلار طبیل اولماز


دوز واختا دولار تاختا – طاباق ادویه ایله

اونداکی ننه م سانجیلانار زنجفیل اولماز


بو « شهریار » ین طبعی کیمی چیممه لی چشمه

کوثر اولا بیلسه دئمیرم ، سلسبیل اولماز


۱۳۴۸